Xaalada magaalada Marka ayaa caawa degan, kadib dagaal culus oo u dhaxeeyay labo ciidan uu maanta ka dhacay gudaha degmadaas, iyadoo magaalada ay caawa u qeybsan tahay labo dhinac.
Sida ay sheegayaan wararka dagaalka ayaa waxaa ku dhintay ilaa
3-ruux, halka lix kale ay ku dhaawacmeen, kuwaasoo ahaa dad rayid ah iyo
labadii dhinac ee dagaalamay.
Wararka ayaa sheegaya in dadka dhaawacmay uu ku jiro Taliyaha guutada
shanaad ee Ciidamada xooga dalka Col. Liibaan Madaxweyne iyo saddex
kale oo shacab ahaa, kuwaasoo dhaawacooda ay qaadeen Ciidamada AMISOM.
Dagaalka labada dhinac oo socday muddo saacado ayaa waxaa soo kala dhex galay Ciidamada AMISOM iyo maamulka deegaanka.
Gudoomiyaha Gobolka Shabellaha Hoose C/qaadir Maxamed Nuur ayaa ku
eedeeyay dagaalka inay ka dambeeyeen Ciidamo uu sheegay in hab beeleed u
abaabulan yihiin, kuwaasoo uu xusay inay ka goos-qabaan wasaarada
Arrimaha gudaha iyo Xafiiska Ra’iisul Wasaaraha.
“Mar hore ayay jirtay hadal heynta, anagana waa nagu badatay ciidamo
beeleedkaan, waxaa cabasho u gudbineynaa wasaarada arrimaha gudaha iyo
xafiiska ra’isul wasaaraha, hadii la sheegay in boolis ahaan u
shaqeynayaan anaga wadnaha farta ku heynay inay sameyn karaan waxyaabo
nuucaan iyo kuwa ka sii daran, Tallaabo ayaana ka qaadaneynaa”ayuu yiri
C/qaadir Siidii.
C/qaadir Siidii ayaa sheegay in ciidanka ay aheyd in laga qaado
magaalada oo la xareeyo, ama hubka laga dhigo, isagoo muujiyo in hadii
ay sii joogaan ay dhibaatada sii badan karto sida uu yiri.
Dadka magalaada Marka ayaa soo sheegaya in dhinacyadii dagaalamay ay
isku hor fadhiyaan magaalada, ayna labo dhinac u kala qeybsan tahay,
waxaana laga cabsi qabaa in mar kale labada dhinac dagaalamaan.
Ma jirto wax war ah oo ka soo baxay Xukuumada Soomaaliya oo ku aadan
dagaalka galabta ka dhacay magaalada Marka, ee dhex maray Ciidamo hab
beeleed u abaabulaan, balse dhinac ka mid ay ahayeen Ciidamada
Milateriga, halka dhinaca kale ay ahaayeen Ciidamo Madani ah.
_____________________________Xafiiska Shabakada warcadnet
Usa-Alaska
ceelka@gmail.com
www.warcadnet.blogspot.com
Facebook Blogger Plugin by deercali.blogspot.com | Get Widget
Posted by , Published at 00:56 and have
