daajis.com:- Guddiga sare ee maamula ururka Midawga Yurub ayaa soo jeediyey in la hakiyo lacag gaadhaysa 7.5 billion oo Yuuro oo la siin jiray dalka Hungary oo xubin ka ah ururka Midawga Yurub, iyada oo walaac xooggan laga qabo musuqmaasuqa dalkaas ka jira iyo weliba dib u dhac ku yimi nidaamkiisa dimoqraadiyadda.
Guddoomiyaha miisaaniyadda ee ururka Midawga Yurub Johannes Hahn ayaa sheegay in dalka Hungary uu haysto illaa bisha November 19-keeda, si uu wax uga qabto waalaca uu qabo ururka Midawga Yurub.
"Waxay ku saabsan tahay jebinta sharciga oo wax u dhimaya isticmaalka iyo maareynta lacagaha EU," ayuu yidhi Johannes Hahn oo ku sugan Brussels.
Tallaabo kasta oo lagu joojinayo lacagaha la siiyo dalka Hungary, waxay u baahan tahay inay isku raacaan dhammaan 27-ka waddan ee uu ka kooban yahay ururka Midawga Yurub.
Waxyar ka dib markii uu warkani soo baxay, Wasiirka Hungary u qaabilsan wada xaajoodka oo lagu magcaabo Tibor Navracsics ayaa sheegay inay jirto fursad wanaagsan oo ay dawladdiisu heshiis kula geli doonto ururka Midawga Yurub dhammaadka sannadkan, si ay u helaan lacagaha uga yimaadda ururkaas.
Toddobaadkii hore saraakiisha sarsare ee Hungary ayaa si cadho leh uga falceliyey hadal ka soo yeedhay baarlamaanka EU, kaas oo ansixiyey qaraar sheegay in dalka Hungary aanay ka jirin dimoqraadiyad buuxda, Xisbiga ka arrimiya dalka Hungary ayaa sheegay in Midawga Yurub ay markale soo weerarayaan dalkiisa Hungary.
Hase ahaatee madaxa shaqaalaha ee xafiiska Ra’iisal wasaaraha Hungary ayaa sheegay in dawladdiisu ay ka shaqaynayso sidii ay u samayn lahayd koox gaar ah oo qaabilsan la dagaalanka musuqmaasuqa, isla markaana ay la shaqaynayaan ururada aan dawliga ahayn, si ay u korjoogteeyaan, habka loo bixinayo dhaqaalaha ka yimaadda Midawga Yurub.
Viktor Orban oo markii afraad dib loogu doortay dalka Hungary bishii April ee sannadkan ayay Midawga Yurub isku haystaan qodobo ay ka mid yihiin madaxbanaanida garsoorka, xuquuqda dadka isku jinsiga ah ee damacu kala galo, warbaahinta iyo madaxbaanida diimaha.
Qaybo ka mida macluumaadka ku jira warbixintan, waxaa laga soo xigtay wakaaladaha wararka ee Reuters iyo AP.
FADLAN LIKE SII BOGGA DAAJIS.COM EE FACEBOOK.
_____________________
Xafiiska Shabakada Daajis.com
USA-Alaska
Ceelka@gmail.com
www.daajis.com
Facebook Blogger Plugin by deercali.blogspot.com | Get Widget
Posted by , Published at 22:39 and have
